काठमाडौं । जनकपुरबाट काठमाडौंका लागि उडान भरेको बुद्ध एयरको विमानको अगाडिको टायर उड्ने क्रममा जनकपुरमै खसेको छ। तर, विमान त्रिभुवन अन्तर्राष्ट्रिय विमानस्थलमा सुरक्षित अवतरण गर्न सफल भएको छ।
बुद्ध एयरको ९एन-एएनएच विमान बेलुका ५:४५ बजे जनकपुरबाट उडान भरिरहेको बेला अगाडिको एउटा टायर रनवे नजिकै खसेको नेपाल नागरिक उड्डयन प्राधिकरणले जनाएको छ। विमानमा ६२ जना यात्रु सवार थिए।
त्रिभुवन अन्तर्राष्ट्रिय विमानस्थलमा विमान सुरक्षित रूपमा अवतरण गरेपछि मात्र टायर हराएको पत्ता लागेको थियो। पोस्ट-फ्लाइट चेक गर्दा नोज ल्यान्डिङ गियरको एउटा टायर नभएको पुष्टि भएको हो। जनकपुर विमानस्थलमा सम्पर्क गर्दा जहाज उड्ने क्रममा नै टायर खसेको जानकारी प्राप्त भएको छ।
यद्यपि, घटनाबाट कुनै दुर्घटना नभएको र सबै यात्रु सुरक्षित रहेको बुद्ध एयरले जनाएको छ। यस घटनापछि नागरिक उड्डयन प्राधिकरणले थप अनुसन्धान अघि बढाएको छ।
