फाल्गुन २३ ।
कपिलवस्तुको इलाका प्रहरी कार्यालय हर्दौनाको आयोजनामा फागुन २३ गते महाराजगञ्ज नगरपालिका-१०, अल्गीस्थित समुदाय प्रहरी साझेदारी कार्यक्रम अन्तर्गत महिला, बालबालिका तथा जेष्ठ नागरिकविरुद्धको अपराध तथा हिंसा नियन्त्रण सम्बन्धी जनचेतनामूलक अन्तरक्रिया कार्यक्रम सम्पन्न भयो।
उक्त कार्यक्रममा इलाका प्रहरी कार्यालय हर्दौनामा कार्यरत प्रहरी वरिष्ठ नायब निरीक्षक मन्जु कुमारी रानाले करिब ६०-७० जना स्थानीय व्यक्तिहरूसँग अन्तरक्रिया गर्दै महिला, बालबालिका तथा जेष्ठ नागरिकविरुद्ध हुने अपराध तथा हिंसा नियन्त्रणका उपायबारे जानकारी गराउनु भयो।
मन्जु कुमारी राना कपिलवस्तु जिल्लामा प्रहरी चौकी, इलाका प्रहरी कार्यालय तथा वडा प्रहरी कार्यालयहरूमा इन्चार्जका रूपमा जिम्मेवारी सम्हाल्ने पहिलो महिला प्रहरी अधिकारी हुनुहुन्छ। यसअघि जिल्लाका सबै प्रहरी इन्चार्जहरू पुरुष नै रहँदै आएका थिए।
कार्यक्रमले समुदायमा सुरक्षासम्बन्धी जनचेतना फैलाउन र महिला नेतृत्वलाई प्रवर्द्धन गर्न महत्त्वपूर्ण भूमिका खेल्ने अपेक्षा गरिएको छ।
