अनेक पाण्डे ,कपिलवस्तु, माघ १।
एक होऊ, क्रियाशील बनो, कुष्ठरोग निवारण गरौं भन्ने मूलनाराका साथ कपिलवस्तु जिल्लाभर ७२औं कुष्ठरोग दिवस विविध कार्यक्रम गरी मनाइएको छ। जिल्लामा कुष्ठरोग निवारण चुनौतीपूर्ण बन्दै गइरहेकाले विभिन्न पालिका स्तरमा कार्यक्रमहरूको आयोजना गरिएको हो।
चालु आर्थिक वर्ष २०८१/८२ को साउनदेखि पुससम्मको ६ महिनामा मात्र ६० नयाँ कुष्ठरोगी फेला परेका छन्। यस अवसरमा आधारभूत स्वास्थ्य परियोजनाले विभिन्न स्थानीय तहका स्वास्थ्य शाखासँगको समन्वयमा कुष्ठरोग प्रभावित व्यक्तिहरूलाई “एमसीआर” रबरले तयार गरिएका चप्पल वितरण गरेको छ।
कपिलवस्तु नगरपालिकामा १३ जना, बुद्धभूमि नगरपालिकाको दुबिया स्वयं हेरचाह समूहमा २३ जना, हरिहरपुर समूहमा १२ जना, शिवराज नगरपालिकाको चमरबोज्हिया समूहमा २१ जना, वियानगर गाउँपालिकाको जवावैराठ समूहमा १८ जना, मायादेवी गाउँपालिकाको बलुहवा समूहमा ८ जना, र वाणगंगा नगरपालिकाको सुइटी समूहमा १० जना गरी जिल्लामा कुल १०५ कुष्ठरोग प्रभावित व्यक्तिहरूलाई चप्पल हस्तान्तरण गरिएको थियो।
स्वास्थ्य कार्यालयका तथ्यांकअनुसार चालु आर्थिक वर्षमा प्रति १० हजार जनसंख्यामा २.७ प्रतिशत कुष्ठरोगी दर्ता भएका छन्। आर्थिक वर्ष २०८०/८१ मा १८८, २०७९/८० मा १६८, २०७८/७९ मा १२१, र २०७७/७८ मा १२८ नयाँ बिरामी दर्ता भएका थिए।
कार्यक्रममा स्वास्थ्य कार्यालयका वरिष्ठ क्षय कुष्ठ अधिकृत मोहम्मद ईरफान, कालिका स्वावलम्बन सामाजिक केन्द्रका अध्यक्ष मन्दिप सिंह, सचिव अजय चौधरी, आधारभूत स्वास्थ्य परियोजनाका कार्यक्रम संयोजक निशान कुवर, फिल्ड सुपरभाइजर अनेक पाण्डे, विभिन्न पालिकाका स्वास्थ्य संयोजक, वडा अध्यक्ष, र स्वयं हेरचाह समूहका सदस्यहरूको उपस्थिति रहेको थियो।
