कपिलवस्तु, साउन ६।
भारतसँग जोडिएको कपिलवस्तु जिल्लाको मायादेवी गाउँपालिका–४ चाकलचौडामा सशस्त्र प्रहरीले गरेको लाठीचार्जमा तीन जना घाइते भएका छन् ।
स्थानीयवासीका अनुसार घटना चाकलचौडा बजारमा सुरु भएको हो, जहाँ १५ वर्षीय एक बालकले किराना सामानको पैसा नदिएको आरोप लगाउँदै सशस्त्र प्रहरी टोलीले कुटपिट गरेको बताइन्छ । उक्त विवाद बढ्दै गएपछि गुल्म प्रमुख सशस्त्र प्रहरी नायब उपरीक्षक (डीएसपी) हरि बहादुर गुरुङ नेतृत्वको टोलीले लाठीचार्ज गरेको प्रत्यक्षदर्शीले बताएका छन् ।
लाठीचार्जमा परेर पिपराका ७५ वर्षीय अब्दुल कयुम, ५५ वर्षीय चिरकुट लोध र बुलाडिहवाका १६ वर्षीय साहिल मुसलमान घाइते भएका छन् । उनीहरूलाई भैरहवास्थित युनिभर्सल मेडिकल कलेजमा भर्ना गरिएको छ । घाइते साहिलको हातको नसा काटिएको र अवस्था गम्भीर रहेको चिकित्सकले जनाएका छन् ।
स्थानीयवासीले सशस्त्र प्रहरीको कदमलाई “अनावश्यक ज्यादती” भन्दै विरोध गरेका छन् । मायादेवी–८ का अरबिन्द प्रसाद तिवारीले भने– “बिना सोधपुछ, बृद्धदेखि महिलासम्मलाई समेत कुटपिट गरियो । मलाई समेत लाठी प्रहार गरिएको छ,” दाबी गरे ।
सीमावासीले प्रहरी र सशस्त्र दुवै निकायले दैनिक जीवनमा अनावश्यक चेकजाँच र सानो रकम असुल्ने कार्य गर्ने गरेको आरोप पनि लगाएका छन् ।
यद्यपि जिल्ला प्रहरी कार्यालय कपिलवस्तुका प्रवक्ता डीएसपी रिपेन्द्र कुमार सिंहले भने सडकमा राखिएको मोटरसाइकल हटाउने विषयमा विवाद चर्कँदा भिड अनियन्त्रित भएको र त्यसपछि सशस्त्रले बल प्रयोग गर्नुपरेको स्पष्ट पारे । उनका अनुसार घाइतेको उपचार भइरहेको छ र घटनाबारे थप अनुसन्धान अघि बढाइएको छ ।
