कमलेशचन्द्र गुप्त , फागुन १६ – ग्रामीण स्वावलम्बन विकास केन्द्रको आयोजनामा तथा कृष्णनगर नगरपालिका वडा नं. ९ को सहयोगमा पशुपालन तालिम तथा औषधी वितरण कार्यक्रम सम्पन्न भएको छ। फागुन १४, १५ र १६ गते सञ्चालन गरिएको उक्त कार्यक्रममा कृष्णनगर नगरपालिका वडा नं. ९ का महिलाहरूको उल्लेखनीय सहभागिता रहेको थियो।
तालिममा पशुपालनका आधुनिक विधि, पशु स्वास्थ्य व्यवस्थापन, पोषणयुक्त आहार, रोग नियन्त्रणका उपायहरू सम्बन्धी जानकारी प्रदान गरिएको थियो। साथै, सहभागी किसानहरूलाई आवश्यक औषधीहरू समेत वितरण गरिएको छ।
कार्यक्रममा प्रशिक्षकहरूले पशुपालनलाई व्यावसायिक रूपमा अघि बढाउने उपायहरू तथा स्थानीय स्तरमै रोजगारी सिर्जना गर्ने सम्भावनाहरूबारे जानकारी गराएका थिए। सहभागी महिलाहरूले तालिम अत्यन्त उपयोगी भएको बताउँदै ग्रामीण स्वावलम्बन विकास केन्द्र र नगरपालिकाप्रति आभार व्यक्त गरेका छन्।
