कृष्णनगर, ३० माघ –
भारतबाट नेपालतर्फ आउँदै गरेका एक युवक ब्राउन सुगरसहित पक्राउ परेका छन्। कपिलवस्तु जिल्ला, कृष्णनगर नगरपालिका-३ ट्रान्समिटर नजिक २०८१ माघ २९ गते राति करिब ८:३० बजे प्रहरीले भारतबाट पैदल आएका एक व्यक्तिलाई शंकास्पद रूपमा रोकी चेकजाँच गर्दा उनको साथबाट २७० मिलिग्राम ब्राउन सुगर बरामद गरेको हो।
पक्राउ पर्ने व्यक्ति भारत, उत्तर प्रदेश, बलरामपुर जिल्ला, मदरहवा कला पोस्ट, बिशनपुर टनटनवा भगगीर निवासी ३८ वर्षीय पारस गौड हुन्। उनलाई लागुऔषधसहित नियन्त्रणमा लिएर कानुनी प्रक्रिया अगाडि बढाइएको प्रहरीले जनाएको छ।
यसअघि पनि पारस गौड चोरी मुद्दामा पक्राउ परेका थिए। उनी २०८१ साल जेठ २५ गते चोरी आरोपमा पक्राउ परी तीन महिना कैद सजाय भुक्तान गरेर छुटेका थिए। हाल उनलाई पुनः लागुऔषध मुद्दामा अनुसन्धानका लागि कपिलवस्तु जिल्ला अदालतबाट सात दिनको म्याद थप गरिएको छ।
कृष्णनगरमा लागुऔषध ओसारपसार बढ्दै
पछिल्लो समय कपिलवस्तुको कृष्णनगर क्षेत्रमा लागुऔषध ओसारपसार र प्रयोग बढ्दै गएको छ। सुरक्षा निकायको कडाइबीच पनि भारतबाट नेपालतर्फ लागुऔषध भित्र्याउने क्रम नरोकिएको देखिन्छ। पछिल्लो केही महिनायता मात्रै प्रहरीले कृष्णनगर क्षेत्रबाट थुप्रै व्यक्तिलाई ब्राउन सुगर, चरेस र अन्य लागूऔषधसहित पक्राउ गरिसकेको छ।
प्रहरीका अनुसार सीमा क्षेत्र नजिकै लागुऔषध कारोबारीहरूको सक्रियता बढ्दै गएको छ, जसका कारण युवा पुस्ता जोखिममा पर्ने खतरा रहेको छ। लागुऔषध नियन्त्रणका लागि प्रहरीले निगरानी बढाएको र आवश्यक कारबाही जारी राख्ने प्रहरी निरीक्षक सुरज खत्रीले जनाएका छन ।
