कपिलवस्तु, फागुन १९
सशस्त्र प्रहरी बल, नेपालले सीमा क्षेत्रमा कडा निगरानी गर्दै अवैध तस्करी रोक्न विशेष अभियानलाई तिव्रता दिएको छ। यही क्रममा कृष्णनगर, महाराजगंज, र बिजयनगरका विभिन्न स्थानबाट रु २,३२,७७१ बराबरका भन्सार छली गरी ल्याइएका सामान बरामद गरिएको छ।
बसको सिटमुनी लुकाएर ल्याइएको भन्सार छली सामान बरामद
सशस्त्र प्रहरी बल, नेपाल प्रस्तावित सीमा सुरक्षा गुल्म कृष्णनगर अन्तर्गत चेकपोस्टमा गरिएको विशेष जाँचका क्रममा कृष्णनगरदेखि चन्द्रौटा जाँदै गरेको यात्रुबाहक बसमा फल्स बक्स बनाई लुकाइएका विभिन्न कपडा र किराना सामान बरामद गरिएको छ। साडी, लेडिज सुट, कुर्ता सुरुवाल, अन्डरवेयर, ड्राई फ्रुट्स (काजु, बदाम, पेस्ता, खजुर) लगायतका सामानहरू रु १,००,५०० मूल्य बराबरका रहेको बताइएको छ। बरामद सामग्री आवश्यक कारबाहीका लागि कृष्णनगर भन्सार कार्यालयमा बुझाइएको छ।
गुल, बीडी, सुर्ती, काजु–बदामसहित किराना सामान बरामद
सशस्त्र प्रहरी बल, नेपाल बि.ओ.पि. भिल्मी टोलीले महाराजगंज नगरपालिका–७ सतभरामा गरिएको गस्तीका क्रममा भारतबाट भन्सार छली ल्याइएका किराना सामग्री बरामद गरेको छ। पक्राउ परेका सामानहरूमध्ये गुल, बीडी, सुर्ती, काजु–बदाम गरी रु ३२,२७१ मूल्य बराबरका रहेको जनाइएको छ। ती सामग्री पनि भन्सार कार्यालयमा बुझाइएको छ।
अवैध रूपमा ल्याइएको ब्रोइलर कुखुरा नष्ट
त्यस्तै, बि.ओ.पि. बिजयनगर टोलीले बिजयनगर गाउँपालिका–२ लोहरौलामा भारतबाट अवैध रूपमा ल्याइँदै गरेको १५० केजी ब्रोइलर कुखुरा बरामद गरेको छ। स्थानीय जनप्रतिनिधि र पशु क्वारेन्टाइन कार्यालयको रोहबरमा ती कुखुराहरू नष्ट गरिएको छ भने ढुवानीमा प्रयोग भएको मोटरसाइकललाई भन्सार कार्यालयमा बुझाइएको छ।
सशस्त्र प्रहरी बलको निगरानी अझै कडा
सीमावर्ती क्षेत्रमा तस्करी रोक्न सशस्त्र प्रहरीले निरन्तर गस्ती गरिरहेको छ। हालैका दिनमा तस्करीका गतिविधि बढ्दै गएकाले सुरक्षाकर्मीहरूले कडाइ अपनाएको बताएका छन्। बरामद गरिएका सबै अवैध सामग्रीलाई कृष्णनगर भन्सार कार्यालयमा बुझाइएसँगै कानुनी प्रक्रिया अघि बढाइएको बताइएको छ।
