चन्द्रौटा , चैत ९ – भारतबाट अवैध रूपमा भन्सार छली चोरी पैठारी गरी ल्याइएका कुखुरा र माछा कपिलवस्तु प्रहरीले नष्ट गरेको छ। प्रहरीका अनुसार, शिवराज नगरपालिका–६, बिरपुर स्थित प्रहरी चौकी बिरपुरका प्र.स.नि. जितबहादुर वली को कमाण्डमा खटिएको गस्ती टोलीले लु ४३ प. ६४२८ नम्बरको मोटरसाइकल जाँच गर्ने क्रममा ७० किलो बोइलर कुखुरा बरामद गरेको थियो। भारतबाट अवैध रूपमा ल्याइएको सो कुखुराको अनुमानित मूल्य रु २८,००० रहेको छ। बरामद कुखुरालाई जनप्रतिनिधि र पत्रकारको रोहवरमा वडा प्रहरी कार्यालय चन्द्रौटा, कपिलवस्तुको कम्पाउन्डमा खाल्डो खनी नष्ट गरिएको प्रहरीले जनाएको छ।
त्यस्तै, शिवराज नगरपालिका–१, उमरी चोक मा खटिएको अर्को प्रहरी टोलीले UP55AH2022 नम्बरको मोटरसाइकल चेकजाँच गर्दा ७० किलो बैखी जातको माछा अवैध रूपमा ल्याएको फेला परेको थियो। प्र.स.नि. प्रमोद कुमार लोध को नेतृत्वमा गरिएको सो कारबाहीमा पनि अवैध रूपमा ल्याइएको माछा खाल्डो खनी नष्ट गरिएको छ।
