काठमाडौं। बिहीबार प्रधानमन्त्री निवास बालुवाटारमा नेकपा एमाले अध्यक्ष केपी शर्मा ओली प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ लाई भेट्न पुगे । भेटमा अध्यक्ष ओलीले प्रधानमन्त्री प्रचण्डसँग समसामयिक राजनीतिक विषयमा कुराकानी गरेको बताइएको छ ।
बालुवाटार पुगेर प्रधानमन्त्रीसँग भेटवार्ता सकिएपछि निस्किएका उनलाई पत्ररकारले घेरिहाले । पत्रकारहरुले अध्यक्ष ओलीले एमाले सचिव टोबहादुर रायमाझी नक्कली भुटानी शरणार्थी बनाएर ठगी गर्ने प्रकरणमा मुछिएको विषयमा प्रश्न गरे ।
पत्रकारले सोधेको प्रश्नको उत्तरमा ओलीले दोषी भए जोसुकैलाई कारबाही गर्ने बताए । तर, उनले बहालवाला सांसदलाई बाटोमै पक्राउ गर्नु रहस्यमय भएको टिप्पणी गरे। साथै, उनले निर्दोष पक्राउ पर्न नहुने र दोषी उम्कन नहुने पनि बताए । निर्दोषलाई फसाउन खोजिए आफूहरु प्रतिकारमा उत्रिने पनि उनले बताए ।
उनले भने, ‘यो तानिएको हो कि तनाइएको हो अध्ययन गर्दैछौं । चार वर्षअगाडि चेक काटेको छ । त्यो पनि उसैसँग रहेको कुरा छ । एउटा सांसद, उपप्रधानमन्त्री भइसकेको पार्टीको नेता षड्यन्त्रपूर्ण ढंगले बाटोमा हिँड्दाहिँड्दै समाउनु रहस्यपूर्ण छ । भागेर जाने कुरा होइन ।’
