काठमाडौं । गत साउन २ गते त्रिभुवन अन्तर्राष्ट्रिय विमानस्थलबाट बाहिरिँदै गरेको झण्डै एक सय किलो सुनसहितको सामग्री राजश्व अनुसन्धान विभागको टोलीले बरामद गरेको थियो ।
सुनको यकिन परिमाण भने अझै आइसकेको छैन । यद्यपि यो प्रकरणले संघीय संसदको दुवै सदनमा विपक्षी दलहरुले अवरोध गरिरहेका छन् ।
अहिलेसम्म मुख्य कारोबारीसम्म पुग्न नसकिएको भनिएको यो प्रकरणमा मुख्यतः तीन जनामाथि विशेष अनुसन्धान भइरहेको छ ।
त्रिभुवन अन्तर्राष्ट्रिय विमानस्थलबाट बाहरिँदै गर्दा साउन २ गते ठूलो परिमाणको सुनसहितको सामान राजश्व अनुसन्धान विभागको टोलीले बरामद गरेको थियो ।
मोटरसाइसकलको ब्रेकसुमा रहेको भनिएको सुन करिब करिब १ सय किलो रहेको अनुमान गरिएको छ । यद्यपि अहिलेसम्म सुनको यकिन परिमाण भने आइसकेको छैन ।
ब्रेकसुमा रहेको भनिएको सुन गालेर निकाल्नुपर्ने भएकाले बरामद गरिएको सुनसहितको उक्त सामान राष्ट्र बैंकमा राखिएको छ ।
नेपालको स्थल र हवाइ नाकाबाट ल्याइएका सुन बारम्बार बरामद गरिए पनि सुनको मुख्य कारोबारी को हो भन्ने कुरा अहिलेसम्म सार्वजनिक हुनै सकेका छैनन् ।
त्यसैले पछिल्लो पटक ठूलो परिमाणको सुन बरामद गरिएपछि भने प्रमुख विपक्षी दल नेकपा एमालेले संसदीय समिति नै बनाएर छानबिन गर्नुपर्ने माग गर्दै आएको छ ।
एमालेले शुक्रबार पनि यहि विषयलाई लिएर संसद बैठक अवरोध ग¥यो । तर सुन तस्करीका सम्बन्धमा अहिले मात्र होइन, आज भन्दा २४ वर्षअघि पनि तस्करीको पत्ता लगाउन भन्दै संसदीय छानबिन समिति बनेको थियो ।
२०५६ सालको संसदमा तत्कालिन नेकपा एकीकृतका सांसद परि थापाको नेतृत्वमा गठित छानबिन समितिले प्रतिवेदन नै तयार गरी संसदमा पेश गरेको थियो ।
त्यतिबेलाको प्रतिवेदनमा पनि ब्यापारी दीपक मलहोत्रासहितको नाम उल्लेख थियो ।
मलहोत्राले विदेशी मुद्रा निकासी गरी अवैध रुपमा सुन भित्र्याउने गरेको प्रतिवेदनमा उल्लेख थियो ।
जतिबेला मलहोत्रासहित, अनिल जाटिया, प्रकाश वेगानी, शंकर गोल्यान, आइएल प्रधान, टेकबहादुर गुरुङ, जमिम शाह, ताहिर शाह, प्रकाश टिवडेवाला, धोजेन्द्र गौचन, विष्णु जोशी, छविलाल भुसाल, अशोक सुरेखा, हरि न्यौपाने र दीपक स्वाँर पनि अवैध कारोबारी रहेको प्रतिवेदनमा उल्लेख थियो ।
पछिल्लो पटक सुन बरामद गरिएपछि पनि मलहोत्राले हतारहतार पत्रकार सम्मेलन नै गरी आफू त्यस सुन प्रकरणमा संलग्न नभएको भन्दै सफाइ दिएका थिए ।
आफू विगतमा सुन ब्यापारमा संलग्न भए पनि पछिल्लो समय त्यस्तो ब्यापारमा नभएको उनको प्रष्टीकरण थियो ।
यो प्रकरणमा रेडि ट्रेडका नाममा सुनसहितको सामान आयात भएकाले उक्त कम्पनीको मालिक भनिएका दोलखाका दीलिप भुजेल, चिनियाँ नागरिक जिक्वान लिन, एक भारतीय नागरिक, भन्सारका कर्मचारीहरुसहित १७ जना पक्राउ परेका छन् ।
पक्राउ परेका ब्यक्तिहरुका घर तथा गोदामहरुमा छापा मारी अन्य सामानहरु पनि बरामद गरिएका छन् ।
मुख्य तस्करी पक्राउ नपरेको भन्दै राजनीतिक आक्षेपहरु लाग्नुका साथै घेराबन्दीकै बीच पनि विभागले आफ्नो अनुसन्धानलाई तीब्र पारेको छ ।
खासगरी सुन प्रकरणमा संलग्न नभएका दाबी गरेका मलहोत्रा र विवादस्पद ब्यापारी राकेश अडुकिया र अर्का एक ब्यापारीमाथि अनुन्धान केन्द्रित रहेको विभाग स्रोतको भनाई छ ।
