नातेदारिक् भाव बदलिगा*
रहन सहन पहिराउ बदलिगा*
मुर्गा दारुस् ठाट बनत है*
बिरियानी मा पुलाव बदलिगा*
पंचाइत कै पंच बदलिगे*
पुरखन सेतिर लगाव बदलिगा*
बहुतै किहिस तरक्की गंउआ*
पीर वहै है घाव बदलिगा* !
बिन मतलब अब समय कहां है*
मनइक् जोर जुराव बदलिगा*
डामर मा चकरोट बदलिगे*
नक्सा ठावैं ठाव बदलिगा*
कहां दुस्मनी जाहिर रहिगै*
पहिले वाला दांउ बदलिगा*
बहुतै किहिस तरक्की गंउआ*
पीर वहै है घाव बदलिगा* !
माई बाप कै फिकिर नही है*
पीढी केरि सुभाव बदलिगा*
भइया भउजी तीत होइ रहे*
बखरी कै अलगाव बदलिगा*
बिटिया बेटवा आंख देखावैं*
संस्कार कै छांव बदलिगा*
बहुतै किहिस तरक्की गंउआ*
पीर वहै है घाव बदलिगा* !
लगे खडे खडे अब खायं खवावैं*
भोजन वाला चाव बदलिगा*
जब से लाग मुहें बिसलेरी*
नल के पानिक् नाव बदलिगा*
पॉपकोर्न पइकिट मा आवा*
लावा कै छटाकाव बदलिगा*
बहुतै किहिस तरक्की गंउआ*
पीर वहै है घाव बदलिगा* !
कुरवा जाइ अन्न घूरे मा*
जीवन केरि अभाव बदलिगा*
भोजन नाहि भूख कै चिंता*
मन कै कुलिउ तनाव बदलिगा*
चाउर दाल तेल तरकारी*
देसी केरि चुनाव बदलिगा*
बहुतै किहिस तरक्की गंउआ*
पीर वहै है घाव बदलिगा* !
सेल्फी अउर सेल्फ कै टक्कर*
नैनन कै टकराव बदलिगा*
लाज सरम अब बइमानी है*
परसिद्धी कै दांव बदलिगा*
अवधी तुहंसे काउ बताई*
केतरा केतरा काउ बदलिगा*
बहुतै किहिस तरक्की गंउआ*
पीर वहै है घाव बदलिगा* !!
[ संजय श्रीवास्तव “अवधी” ]
मनकापुर गोंडा उत्तर प्रदेश
संपर्क : ८४३७१३२८९७
@सर्वाधिकार सुरक्षित ?
