पोखराको लेकसाइड (हल्लनचोक नजिक) मा बिहान १० बजेदेखि ७ बजेसम्म कार्यक्रम आयोजना हुने कलेजका प्रशासक चिजकाजी गुरुङले जानकारी दिए । कलेजमा स्नातक तह अन्तिम वर्षका विद्यार्थीद्वारा गरिएका शोधकार्यको सिर्जना सार्वजनिक गर्दै थप हौसला प्रदान गर्न प्रदर्शनी आयोजना गरिएको उनले बताए । साथै, उक्त सिर्जनाहरुको व्यावसायिक उपयोगिताको प्रवद्र्धनका लागि विभिन्न उद्योग, व्यावसाय, निर्माण कम्पनी शैक्षिक संस्था तथा अन्य सरोकारवाल क्षेत्रका व्याक्तिहरुलाई अवलोक गराउनु अर्को उद्देश्य रहेको उनले सुनाए । विद्यार्थीहरुले तयार पारेका मोडल, भिडियो तथा तस्विर प्रदर्शन गरिने भएको हो ।
उक्त प्रदर्शनीमा क्रिकेट स्टेडियम, फुटबल स्टेडियम, इन्टरनेसनल स्कुल, सिनेमा सेन्टर, इको रिसोर्ट, पब्लिक लाइब्रेररी लगायत अन्य २२ संरचनाको आर्किटेक्चर मोडल प्रस्तुत गरिने क्याम्पसका प्रिन्सिपल सोम गुरुङले बताए । कार्यक्रमको उद्घाटन पोखरा विश्वविद्यालयका रजिस्ट्रार प्राडा दीपकबहादुर भण्डारीले गर्ने उनले जानकारी दिए ।
कार्यक्रममा विद्यार्थी, अभिभावक, इन्जिनियरिङ र आर्किटेक्चर पेसाकर्मी, सरकारी कर्मचारी, उद्योगी व्यावसायी लगायत ३ देखि ४ हजारले सहभागिता जनाउने कलेजकी आर्किटेक्चर विभागीय प्रमुख समीक्षा कँडेलले जानकारी दिइन् । यसका लागि पोखरा र पोखराभन्दा बाहिरका ८० भन्दा बढी कलेजसँग विभिन्न संघसंस्थालाई पत्राचार गरिसकिएको उनले बताइन् ।
कार्यक्रमले प्राविधिक र सामाजिक उत्थानमा सहयोग गर्ने, नयाँ प्रविधि र राज्यको दिगो विकासमा सहयोग गर्ने, व्यावसायिक संघसंस्था, आर्किटेक्चर पेसाकर्मी र विद्यार्थीबीचमा सहकार्यसँगै नेटवर्किङलाई प्रोत्साहन गर्ने उद्देश्य लिएको छ ।
