काठमाडौं ।
सुपर डुपरहिट फिल्म जात्रा र जात्रै जात्रापछि निर्माणाधीन महाजात्राको फस्ट लुक्स सार्वजनिक गरिएको छ। जसमा ख्यातिप्राप्त हास्यव्यंग्य अभिनेता हरिवंश आचार्यसँगै जात्रा शृङ्खलाका तीन कलाकार विपिन कार्की, रवीन्द्रसिंह बानियाँ र रवीन्द्र झालाई प्रस्तुत गरिएको छ।
सार्वजनिक पोस्टरमा जात्रादेखि नै फणिन्द्र (विपिन), जोएश (रवीन्द्र बानियाँ) र मुन्ना (रवीन्द्र झा) को भूमिकामा देखि“दै आएका तीन पात्रले अभिनेता आचार्यलाई ह्विलचेयरमा लागिरहेका छन्।
उनीहरूले अभिनेता आचार्यलाई बन्दी बनाएको संकेत पोस्टरले गरेको छ। फिल्मका अभिनेता तथा कार्यकारी निर्माता बानियाँले फिल्मको कथासार झल्किने पोस्टर सार्वजनिक गरिएको बताए।
‘पोस्टरमा देखिएका पात्रले पनि यसको कथासार झल्काउँछ। पृष्ठभूमिमा गाडी, पैसा अनि हामी तीनसँगै हरि दाइ। यसले धेरै विषय संकेत गरेको छ’, अभिनेता बानियाँले भने।
षट्कोण आर्ट्सको निर्माणमा तेस्रो शृङ्खलास्वरूप निर्माणाधीन महाजात्रामा जीवन समृद्ध तुल्याउने सपना र आपतकालीन रूपमा प्राप्त हुने अवसर व्यवस्थापन गर्दा आइपर्ने समस्यालाई रोचक ढंगले प्रस्तुत गरिएको छ।
निर्देशक प्रदीप भट्टराईले फिल्ममार्फत प्रस्तुत गर्दै आएको भावमै रहेर कथा तयार गरिएको बताए। फिल्ममा हासो र रोदनको मिश्रण छ।
अर्गानिक र यथार्थलाई प्रस्तुत गरिएकै कारण यो शृङखला दर्शकको प्रिय बन्दै आएको छ। नेपालमा यसले रेकर्ड ब्रेक व्यापार गर्ने अनुमान वितरकले गरिरहेका छन्। फिल्मको वर्ड अफ माउथले पनि यसलाई नयाँ नयाँ रेकर्ड बनाउन सहयोग गर्ने विश्वास गरिएको छ।
फिल्ममा वर्षा राउत, अर्जुनजंग शाही, प्रकाश घिमिरे, राजाराम पौडेल, प्रवीण खतिवडा, दिव्यदेव, सुमन कार्की, शिशिर वाङ्देल, गौमाया गुरुङ, अरविन खड्कालगायतले पनि अभिनय गरेका छन्।
म्याक्स दीपेश खत्रीसँगै यज्ञेश्वर पौडेल निर्माता रहेको फिल्मको अन्तर्राष्ट्रिय प्रदर्शन अधिकार एमएसएम इन्टरटेनमेन्टले खरिद गरिसकेको छ। कम्पनीका प्रमुख छत्र थापाका अनुसार फिल्म आगामी चैत ९ गते नेपालसँगै विश्वका विभिन्न देशमा एकसाथ प्रदर्शन हुनेछ।
फिल्मको एक गीतमा अभिनेता अरुण क्षेत्री र मोडल आश्मा विश्वकर्मा देखिने छन्। एकनारायण भण्डारीको शब्द, आशिष अविरलको संगीत तथा आशिषसँगै अस्मिता अधिकारीको स्वर रहेको क्या राम्रो गीतमा कविराज गहतराजले नृत्य निर्देशन गरेका छन्।
फिल्ममा जितबहादुर रुवाली एसोसियट निर्देशक, पुरुषोत्तम प्रधान छायाँकार, कुमार महर्जन द्वन्द्व निर्देशक, कविराज गहतराज नृत्य निर्देशक, आशिष अविरल संगीतकार, शमशेर लामा शृंगार, रूपकप्रताप अधिकारी प्रोडक्सन डिजाइनर रहेका छन्।
