मायादेवी गाउँपालिकाद्वारा आयोजित पाँचौं राष्ट्रपति रनिङ शिल्ड तथा अध्यक्ष कप प्रतियोगितामा छत्रपाली तिर्थादेवी माविले लगातार पाँचौं पटक उपाधि जित्दै आफ्नो वर्चस्व कायमै राखेको छ।
प्रतियोगितामा छत्रपाली तिर्थादेवी माविले ११ स्वर्ण, ९ रजत, १ कास्य पदक सहित कुल २१ पदक जित्दै उपाधि रक्षा गर्न सफल भयो। जनता मावि बलुहवाले ६ स्वर्ण, ८ रजत, ४ कास्य पदकसहित दोस्रो स्थान हासिल गर्यो भने मुनेश्वर माविले ५ स्वर्ण, १ रजत, १ कास्य पदक जित्दै तेस्रो स्थान प्राप्त गर्यो।
बिजेता टिम र खेलाडीहरूलाई पूर्व मन्त्री तथा भारतका लागि पूर्व नेपाली राजदूत दीप कुमार उपाध्याय, लुम्बिनी प्रदेशसभा सदस्य मधुसूदनशरण चौधरी, पूर्व प्रदेश मन्त्री सहसराम यादव, र गाउँपालिका प्रमुख वलीउद्दीन मुसलमानले कप, मेडल र प्रमाणपत्र प्रदान गरे। सो अवसरमा पूर्व राजदूत उपाध्यायले खेलाडीहरूले अनुशासनमा रही प्रतिस्पर्धा गर्नुपर्नेमा जोड दिए। साथै, उनले खेलकुद विकासका लागि तीनवटै तहका सरकारले लगानी बढाउनु आवश्यक रहेको बताए।
प्रदेशसभा सदस्य चौधरीले खेल सामग्री मात्र वितरण गरेर खेल क्षेत्रको विकास सम्भव नहुने भन्दै शिक्षामा खेलकुदको लगानी वृद्धि गर्नुपर्ने आवश्यकतामा जोड दिए। साथै, उनले गाउँपालिकामा रंगशाला निर्माणका लागि पहल गर्ने प्रतिबद्धता व्यक्त गरे।पूर्व प्रदेश मन्त्री यादवले अधुरो रहेको खेल मैदान छिट्टै सम्पन्न गर्नुपर्ने बताउँदै खेल क्षेत्रको विकासमा आवश्यक पहल गर्ने प्रतिबद्धता जनाए।
गाउँपालिका प्रमुख मुसलमानले सीमित बजेटका बाबजुद खेल क्षेत्रमा प्राथमिकता दिइएको उल्लेख गर्दै, शिक्षा, स्वास्थ्य र खेललाई गाउँपालिकाले उच्च प्राथमिकता दिएको जानकारी दिए।प्रतियोगिताका अवसरमा उत्कृष्ट खेल शिक्षक, अनुशासित विद्यालय, तथा खेल क्षेत्रलाई सहयोग पुर्याउने व्यक्तिहरूलाई सम्मान पत्र प्रदान गरिएको कार्यक्रम संयोजक हिन्दराज चौधरीले जानकारी दिए।
गाउँपालिकाको शिक्षा तथा खेलकुद शाखा प्रमुख माधव घिमिरेका अनुसार २१ विद्यालयका छात्र-छात्रा यो प्रतिस्पर्धामा सहभागी भएका थिए।
