नेपाल प्रिमियर लिग (एनपीएल) २०२४ मा आज दुई रोमाञ्चक खेल हुँदै छन्। शनिबार बिहान ९:१५ बजे त्रिवि क्रिकेट मैदान, कीर्तिपुरमा लुम्बिनी लायन्स र सुदूरपश्चिम रोयल्सबीच प्रतिस्पर्धा हुनेछ। लुम्बिनी लायन्सका लागि यो खेलमा जित निक्कै महत्वपूर्ण छ, किनभने टोलीले आफ्नो सुरुवाती दुई खेलमा पराजय बेहोरेको छ। लुम्बिनी पहिलो खेलमा विराटनगर किंग्स र दोस्रो खेलमा पोखरा एभेन्जर्ससँग पराजित भएको थियो।
त्यसैगरी, सुदूरपश्चिम रोयल्स यो सिजन अपराजित रहेको छ। टोलीले आफ्नो पहिलो खेलमा विराटनगर किंग्सलाई ९० रनले र दोस्रो खेलमा काठमाडौं गुर्खाजलाई ७३ रनले हराउँदै उत्कृष्ट लयमा रहेको छ।
दोस्रो खेल दिउँसो १:१५ बजे कर्णाली याक्स र विराटनगर किंग्सबीच हुनेछ। तीन खेल खेलिसकेको कर्णालीले एक खेल जित्दै दुई खेलमा हार बेहोरेको छ। उता, विराटनगर किंग्सले पनि समान तीन खेलमा एक जित र दुई हारको नतिजा निकालेको छ। आजका खेलहरूले अंक तालिकामा महत्वपूर्ण प्रभाव पार्ने भएकाले दुवै खेल रोमाञ्चक हुने अपेक्षा गरिएको छ।
