कपिलवस्तु । कृष्णनगर–५ की ५५ वर्षीया श्रीमती चन्द्रावती चौधरीको उपचार प्रकरणलाई लिएर शिवराज अस्पताल विवादमा परेको छ। अस्पतालले हृदयघात (Heart Attack) भएको बिरामीलाई तत्काल उपचार गरी थप उपचारका लागि अन्य स्वास्थ्य केन्द्र पठाएको दाबी गरेको छ भने, पीडित परिवारले ढिलासुस्ती र बदमासीको आरोप लगाएका छन्।
अस्पतालले जारी गरेको प्रेस विज्ञप्तीमा बिरामीलाई Myocardial Infarction (Heart Attack) भएको पुष्टि भएपछि तुरुन्तै Aspirin 300 mg, Atorvastatin 80 mg र Clopidogrel 300 mg प्रदान गरिएको उल्लेख गरिएको छ। अस्पतालले आपतकालीन सेवामा औषधि अभावका कारण Nitroglycerin उपलब्ध नभएको स्वीकार गर्दै, बिरामीलाई थप उपचारका लागि गौतम बुद्ध सामुदायिक अस्पताल पठाइएको जनाएको छ। विज्ञप्तीमा चिकित्सक र स्वास्थ्यकर्मीमाथि अनावश्यक आरोप नलगाउन आग्रह गरिएको छ।
तर, पीडित परिवार र स्थानीयको भनाइ फरक छ। उनीहरूका अनुसार, २३ गते उपचारका क्रममा डाक्टर बिनोदले गैरजिम्मेवार व्यवहार देखाएका थिए। सोही विषयमा आज बिहान १० बजेदेखि परिवार र समर्थकहरू अस्पताल पुगेका थिए र गुनासो राखेका थिए। तर अस्पताल प्रशासनका प्रमुखहरू र व्यवस्थापन समितिका पदाधिकारीहरू सम्पर्कविहीन रहे।
धेरै समयको पर्खाइपछि समितिका तीन सदस्य — रितेश शर्मा, रेनु शर्मा र शतिष कुमार हरिजन — मात्र अस्पताल पुगेका थिए। पीडित पक्षले तिनै सदस्यहरूसँग डाक्टर बिनोदको बदमासीबारे छानबिन गरी कारबाहीको माग गरेका थिए। तर साँझपख अस्पतालले कुनै साझा छलफल वा हस्ताक्षरबिनै विज्ञप्ती सार्वजनिक गरेको भन्दै स्थानीयले आपत्ति जनाएका छन्।
पीडित पक्षले निष्पक्ष छानबिन समिति गठन गरी घटनाको सत्यतथ्य सार्वजनिक गर्न माग गरेको छ भने, अस्पतालले आफ्नो पक्षमा उपचार प्रक्रिया पूर्णरूपमा व्यावसायिक र जिम्मेवार ढंगले गरिएको दाबी गर्दै स्वास्थ्यकर्मीहरूको सुरक्षा र सम्मानको पक्षमा बयान जारी गरेको छ।
यस घटनाले शिवराज अस्पतालको कार्यशैली र व्यवस्थापन समितिको भूमिकाबारे जनस्तरमा प्रश्न उठाएको छ। स्थानीयहरूले पारदर्शी छानबिन र जवाफदेहिताको माग गर्दै अस्पतालमा सुधारको आवश्यकता औंल्याएका छन्।
