काठमाडाैँ । पूर्वउपप्रधान एवं गृहमन्त्री वामदेव गौतमले सबै कम्युनिष्टहरुलाई एकताबद्ध हुन आह्वान गरेका छन् ।
आईतवार नेपाल कम्युनिष्ट पार्टीका संस्थापक पुष्पलाल श्रेष्ठको ४५ औं स्मृति दिवसलाई सम्बोधन गर्दै उनले समाजवादी मोर्चा बनाउनु राम्रो भए पनि एक÷दुई वटा पार्टी मात्रै मिलेर समाजवादको यात्रा पूरा नहुने बताए ।
नेपालको संविधानले परिकल्पना गरेको लोकतान्त्रिक मूल्य, मान्यतामा आधारित समृद्ध समाज र समृद्ध समाजवादको निर्माण कम्युनिष्ट मोर्चाहरु मिलेर मात्रै सम्भव रहेको उनले बताए । साथै लोकतान्त्रिक मूल्य, मान्यताको समाजवाद, समृद्ध समाजवादको लागि सबै नेपाली कम्युनिष्टहरु एउटै मोर्चामा आउन जरुरी रहेको उनको भनाइ छ ।
उनले समाजवादी मोर्चामा दुई/तीन वटा पार्टी मात्रै नभई नेकपा एमाले, मोहन वैद्य, लगायतका अन्य छरिएर रहेका कम्युनिष्ट पार्टीहरु एक हुनुपर्ने बताए ।
‘सबै कम्युनिष्टहरु एकतामा आऔँ । मोर्चाको उद्देश्य नेपाली जनताको समृद्धिलाई बनाऔँ । नेपालको संविधानले परिकल्पना गरेको लोकतान्त्रिक मूल्य, मान्यतामा आधारित समृद्ध समाज, समृद्ध समाजवाद, कृषि, उद्योग धन्दाको क्षेत्रबाट कहाँबाट शुरु गर्न सकिन्छ, सामाजिक रुपबाट, सामाजिक सहतिको उत्पादनका साधनमाथि जति सकिन्छ त्यति क्षेत्रबाट ठोस कार्यक्रमका साथ हामी सबै लागौँ,’ उनले भने, ‘त्यो नेपालका कम्युनिष्टहरुले मात्रै स्थापना गर्न सक्छन् । त्यस्तो समाजवाद निर्माण गर्न सक्छन् । हामीले पनि त्यो संविधान बन्दा अनेकौँ समस्या झेलेर हामीले राखेको लोकतान्त्रिक मूल्य, मान्यताको समाजवाद, समृद्ध समाजवाद हामीले राखेर, कम्युनिष्टहरुको समाजवाद प्राप्तिको निम्ति एउटा मोर्चामा आवद्ध हुनुपर्छ । जसको लागि प्रचण्ड, कमरेड माधव नेपाल र अरु अरु मिलेर शुरु गर्नुभएको छ, राम्रो काम गर्नुभएको छ तर दुई तीन वटा पार्टी मिलेर मोर्चा बनाउने काम नगर्नुस् ।’
उनले प्रचण्डलाई पनि यस दिशामा सबैलाई जोड्न उनले आग्ह गरे । उनले भने, ‘प्रचण्डजी, नेकपा एमालेका अध्यक्ष र सबैजना, मोहन वैद्यलाई पनि पत्राचार गर्नुस्, नेकपा (माओवादी केन्द्र) बाट फुटेकालाई पनि आवद्ध गर्नेगरी आज आवश्यकता छ, समाजवादको । समाजवाद नै निर्माण गर्ने हो, जति सकिन्छ त्यत्ति सामाजिक उत्पादनका लागौँ । पुनः कम्युनिष्टहरु एक ठाउँमा हुनुपर्छ । कमेरेड पुष्पलालले भन्नुभएको, देख्नुभएको सपना साकार पार्ने हो भने पहिलाकै बाटोमा जानुपर्छ । जसरी पनि त्यो लागू गर्नुपर्छ । त्यसरी मात्रै शक्ति आर्जन गर्नसक्नुपर्छ ।’
नेता गौतमले पुष्पलालले देखको सपना साकार पार्न कम्युनिष्ट पार्टीहरु एक भएर शक्ति आर्जन गर्नुपर्नेमा जोड दिए ।
