पोखरा । माछापुच्छ्रे गाउँपालिका– २ स्थित सार्दीखोला स्वास्थ्य चौकीमा शनिबार निशुल्क आँखा परीक्षण कार्यक्रम भएको छ । सार्दीखोला बचत तथा ऋण सहकारी संस्था र नेपाल दृष्टिविहीन कल्याण संघ कास्कीको आयोजनामा शिविर भएको हो । वडाध्यक्ष गणेश आचार्यले रणबहादुर गुरुङलाई उपचार फारम हस्तान्तरण गरी शिविर उद्घाटन गरे ।
कार्यक्रममा हिमालय आँखा अस्पतालले प्राविधिक सहयोग गरेको थियो । उक्त अवसरमा ३ सय ५० जनाको आँखा परीक्षण गरिएको छ । जसमध्ये १ सय ८९ जना व्यक्तिलाई निशुल्क चस्मा वितरण गरिएको थियो । १५ जनामा मोतिबिन्दु भेटिएको र उनीहरुलाई दुवै आयोजक संस्थाको पहलमा शल्यक्रियाका लागि व्यवस्था गरिने भएको छ ।
सार्दीखोला बचत तथा ऋण सहकारी संस्थाका उपध्यक्ष गिरिधारि आचार्यको सभापतित्वमा भएको कार्यक्रममा संस्थाकै सञ्चालक सपनाकुमारी गुरुङले स्वागत गरेकी थिइन् । शिविर उद्घाटन गर्दै वडाध्यक्ष गणेश आचार्यले संस्थाले गर्दै आएको कार्यक्रमले यस क्षेत्रका बासिन्दा लावान्भित भइरहेकोले भन्दै धन्यवाद दिए । कार्यक्रमको उद्घाटन सत्र संस्थाका सचिव रामप्रसाद आचार्यले सञ्चालन गरेका थिए ।
