सो समयमा पृथ्वीचोकको टेलर्समा बसेर भएको कुराकानीलाई संस्थापक शिक्षक सूर्यमोहन बराल र स्व. ओम शेरचनले बहिरा विद्यार्थीका लागि कल्पना गरेको विद्यालयले अहिले सार्थक रुप लिएको हो । पोखरा २६ अर्घौंमा करिब ५ रोपनीमा ३ पक्की भवनका १५ वटा कोठासहितको विद्यालयमा ४४ जिल्लाका १ सय ५३ जना विद्यार्थीले आवासीयरुपमा शिक्षा लिँदै आएका छन् ।
२०५४ सालमा निमावि, २०५७ सालमा मावि र २०६३ १० जोड २ कक्षा सञ्चालन गर्दै आएको सिर्जना बहिरा माविले मंगलबार ३६ औं वार्षिकोत्सव, अभिभावक दिवस तथा पुरस्कार वितरण कार्यक्रम सम्पन्न गरेको छ ।
कार्यक्रम उद्घाटन गर्दै शिक्षा निर्देशनालय गण्डकी प्रदेशका महानिर्देशक अम्बिकाप्रसाद आचार्यले पढाइ मात्र ठूलो कुरा नभई पढेपछि उनीहरूका लागि सिकाइ र के कस्तो छ भन्ने बारेमा विश्लेषण गरेर उनीहरुलाई हौसला प्रदान गर्नुु नै असल अभिभावक दायित्व हुने उल्लेख गरे ।
विद्यालय व्यवस्थापन समितिका अध्यक्ष प्रकाशलाल श्रेष्ठको अध्यक्षतामा भएको कार्यक्रममा पोखरा शिक्षा महाशाखाका वरिष्ठ शिक्षा अधिकृत बद्री सुवेदी, लेखनाथ नगरपालिकाका संस्थापक नगर प्रमुख शालिकग्राम पौडेल, सामुदायिक विद्यालय व्यवस्थापन समिति महासंघ कास्कीका अध्यक्ष दीपक थापालगायतले बोलेका थिए । विद्यालयका प्रधानाध्यापक सुनीलकुमार भण्डारीले विद्यालयको प्रगति विवरण प्रस्तुत गर्दै भावी योजनाबारे प्रष्ट्याए ।
