जारी ICC T20 World Cup अन्तर्गत आफ्नो अन्तिम खेलमा नेपालले स्कटल्यान्डलाई ७ विकेटले पराजित गर्दै १२ वर्षपछि विश्वकपमा पहिलो जितको स्वाद चाखेको छ।
भारतको मुम्बईस्थित वानखेडे रङ्गशालामा टस जितेर फील्डिङ गरेको नेपालले स्कटल्यान्डलाई १९.२ ओभरमा १७० रनमा समेट्यो। त्यसपछि नेपालले लक्ष्य ३ विकेटको क्षतिमा पूरा गर्दै ऐतिहासिक जित दर्ता गर्यो।
नेपालको जितमा कुशल भुर्तेल र आशिफ शेखले पहिलो विकेटका लागि ७४ रनको उत्कृष्ट साझेदारी गरे। त्यसपछि दीपेन्द्र सिंह ऐरीले आक्रामक ब्याटिङ प्रस्तुत गर्दै २३ बलमै अर्धशतक प्रहार गरे र टोलीलाई जिततर्फ डोहोर्याए।
यसअघि लगातार तीन खेलमा हार बेहोरेको नेपाल समूह चरणबाट बाहिरिइसकेको भए पनि यो जितले खेलाडी र समर्थकलाई ठूलो सान्त्वना दिएको छ।
बलिङतर्फ सोमपाल कामीले ३ विकेट लिँदै विश्वकपमा कुल १० विकेट पुर्याए। यससँगै उनी विश्वकपमा सर्वाधिक विकेट लिने नेपाली खेलाडी बनेका छन्। यसअघि यो कीर्तिमान दीपेन्द्र सिंह ऐरीको नाममा ८ विकेट थियो।
यस्तै, कुशल र आशिफको ७४ रनको साझेदारी विश्वकपमा नेपालको तर्फबाट पहिलो विकेटका लागि सर्वाधिक रनको साझेदारीसमेत बनेको छ।
यसअघि नेपालले इंग्ल्यान्डसँग झिनो अन्तरले हार बेहोरेको थियो भने इटली र वेस्ट इन्डिजसँगका खेलमा अपेक्षित प्रदर्शन गर्न सकेको थिएन। यद्यपि अन्तिम खेलको यो जितले नेपालको विश्वकप यात्रा सम्मानजनक रूपमा टुंगिएको छ।
