पोखरा । पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पतालमा पहिलो दिन ८१ जना किशोरीहरुलाई पाठेघरको मुखको क्यान्सरविरुद्धको ‘एचपिभी’ खोप दिइएको छ ।
बुधबारदेखि सुरु भएको राष्ट्रिय खोप कार्यक्रमअन्तर्गत गण्डकी प्रदेशमा पनि सुरुवात गरिएको हो । १४ वर्ष लागेर १५ वर्ष उमेर पूरा नभएका किशोरीलाई ‘एचपिभी’ खोप दिइएको स्वास्थ्य कार्यालय कास्कीका प्रमुख बद्री आचार्यले जानकारी दिए । विसं २०६५ भदौ ३० देखि २०६६ भदौ २० गतेसम्म जन्मेका किशोरीलाई खोप दिइएको उनले बताए । किशोरीलाई पाठेघरको क्यान्सर लाग्न नदिनका लागि सरकारले सात प्रदेशका ७ अस्पतालमा खोप कार्यक्रम सञ्चालन गरेको हो ।
पोखरा स्वास्थ्य विज्ञान प्रतिष्ठानमा भदौ ३० गतेसम्म खोप कार्यक्रम जारी रहने उनले सुनाए । ‘हामीसँग भ्याक्सिन कम छ । आज ८१ जनालाई लगाइयो । अब भोलि र पर्सी जारी रहन्छ । भोलि नै सकियो भने भोलिबाटै बन्द हुन्छ,’ उनले भने, ‘हामीले टोकन बाडेर फस्र्ट कम फस्र्ट सर्भिस दियौं । आज अलि भीड थिएन् । भोलि बिदाको दिन हो संस्या बढ्न सक्छ ।’
