पोखरा । सगरमाथा निकेतन विद्यालयमा त्रिदिवसीय वार्षिक खेलकुद कार्यक्रम सुरु भएको छ । विद्यालय प्राचार्य दिलीप शर्मा भट्टराईले पोखरा–४ अर्चलबोटस्थित नवनिर्मित विद्यालय प्रांगणमा समारोहको उद्घाटन गरे । उनले मानव स्वास्थ्यका लागि खेलकुद महत्वपूर्ण भएको औंल्याए ।
विद्यार्थी अनुषा अधिकारीले खेल भावनाको सपथ ग्रहण गरेकी थिइन् । प्रतियोगितामा कक्षा १ देखि १० सम्मका झन्डै ४ सय विद्यार्थीले भाग लिएका छन् । उनीहरूले १ सय १७ स्वर्ण, १ सय १६ रजत र ५७ कास्य पदकका लागि प्रतिस्पर्धा गर्नेछन् । फुटबल, भलिबल, ब्याडमिन्टन, टेबल टेनिस, चेस तथा एथलेटिक्सतर्फ सटपुट, १०० मिटर, २०० मिटर, ४०० मिटर, ८०० मिटर, १५०० मिटर, रिले दौडलगायत खेलमा प्रतिस्पर्धा हुने खेलकुद शिक्षक कृष्ण थापाले जनाए ।
अफिसियल सुरज पौडेलका अनुसार पहिलो दिनको खेल विद्यालय खेल मैदानमा, दोस्रो दिन गोस्ते घाट खेल मैदान, लामाचौरमा र समापन पोखरा रंगशालामा गरिने छ । शिक्षक रामजी बरालले कार्यक्रम सञ्चालन गरेका थिए ।
