साउन ४, रुपन्देही ।
स्वदेशी उत्पादनको सिमेन्टपछि छड पनि भारत निर्यात हुन थालेको छ । परासी–भैरहवा करिडोरअन्तर्गत रुपन्देहीको रोहिणीस्थित श्री स्टील्स प्रालिले बुधबारबाट भारतमा टीएमटी छड निर्यात थालेको छ । जिल्लाको रोहिणी–३, सेमरहवा रहेको उद्योगले बेलहिया नाका हुँदै निर्यात सुरुवात गरेको हो ।
उद्योगले भारतको उत्तर प्रदेशस्थित एक सप्लायर्सलाई टीएमटी फलामे छड पठाएको हो । बुधबार उद्योगमा कार्यक्रम आयोजना गरेर निर्यात सुरुवात गरिएको थियो । मुलुकबाट भारतमा टीएमटी फलामे छड निर्यात गर्नेमा सो उद्योग पहिलो बनेको छ । सिमेन्ट उद्योगमा भने पाल्पा इण्डस्ट्रीले तानसेन ब्राण्डको सिमेन्ट निर्यात थालेको छ ।
