हेमजा । अमरसिंह मावि रामघाट पोखरामा विज्ञान संकायका विद्यार्थीले शिक्षकहरुको सम्मानमा कार्यक्रम गरेका छन् । सोही अवसरमा कक्षा १२ विज्ञान संकायमा अध्ययनरत सुलोचना सुवेदी र पवन खड्कालाई पदमलाल पद्मीदेवी दाहाल कोषबाट छात्रवृत्ति वितरण गरियो ।
पृृथ्वीनारायण क्याम्पस भौतिकशास्त्र विभागका पूर्व विभागीय प्रमुख सह–प्राध्यापक कुलप्रसाद दाहालद्वारा स्थापित कोषबाट उक्त छात्रवृत्ति वितरण गरिएको हो । कोषको राशि ५५ हजार ५ सय ५५ रुपैयाँ छ ।
कार्यक्रममा भनाइ राख्दै दाहालले छात्रवृत्ति वार्षिक रुपमा वितरण गरिने विश्वास दिलाउँदै कोषको रकम पनि क्रमश बृद्धि गर्दै जाने प्रतिबद्धता जनाए । उनले विद्यालयसँग आफ्नो गहिरो सम्बन्ध रहेको स्पष्ट पनि पारे ।
विद्यालयका विज्ञान संकाय संयोजक रुना श्रेष्ठको अध्यक्षतामा सम्पन्न उक्त कार्यक्रममा प्रधानाध्यापक तेजश्वी बराल, एकेडेमिक डिन सुरेन्द्र अधिकारी लगायत शिक्षक कर्मचारी एवं विद्यार्थीको उपस्थिति थियो ।
कार्यक्रमका बीच विभिन्न सांस्कृतिक प्रस्तुति साथै प्रतियोगितात्मक साहित्यिक कार्यक्रम समेत भएको थियो ।
