पोखरा । विद्यालयका बसचालक तथा सहचालकलाई लक्षित गर्दै अटोवेज प्रालिले आँखा शिविर गर्ने भएको छ । नयाँबजारस्थित अटोवेज शोरुमको भवनमा बुधबारदेखि शुक्रबारसम्म ३ दिन शिविर सञ्चालन हुने भएको अटोवेजकी निर्देशक सन्ध्या पौडेलले बताइन् ।
उनका अनुसार साउन २९ गते लेखनाथस्थित गण्डकी बहु प्राविधिक शिक्षालयमा र साउन ३० गते लामाचौरस्थित इन्द्रराज्यलक्ष्मी माध्यमिक विद्यालयमा शिविर सञ्चालन गरिने छ ।
‘हामीले स्कुल बसका चालक तथा सहचालकहरूलाई लक्ष्य गरेर अहिले निःशुल्क आँखा जाँच शिविर राखेका छौं । शिविरको उद्देश्य भनेको दिनहुँ सयौं विद्याथीलाई ओसार पसार गर्ने चालक तथा सहचालकहरूको आँखा जाँच गराएर उहाँहरूको आँखा दृष्टि सुरक्षित गराउनु नै हो । उहाँहरूलाई आफ्नो पायक पर्ने स्थानको शिविरमा पुगेर आँखा जँचाउन हामी अनुरोध गर्छौं,’ निर्देशक पौडेलले भनिन् ।
पोखरामा टोयटा, आइसर, कोमात्सु तथा बुलको आधिकारिक बिक्रेता अटोवेजले विद्यार्थी, अभिभावक र विद्यालयसँग जोडेर सामाजिक उत्तरदायित्व अन्तर्गत विभिन्न कार्यहरू गर्दै आएको छ । अटोवेजले गोविन्द कलावती फाउन्डेसनमार्फत गरिब तथा जेहेन्दार विद्यार्थीलाई सहयोग समेत गर्दै आएको छ ।
