पोखरा । पोखरा १३ आर्वामा आयोजित निशुल्क स्वास्थ्य शिविरबाट १ सय ५० जनाले स्वास्थ्य लाभ लिएका छन् । नागेश्वर महादेव मन्दिर विकास समितिको आयोजना र अन्नपूर्ण आयुर्वेदिक क्लिनिक पोखरा १२ शीतलादेवीको प्राविधिक सहयोगमा आर्वा मणिदीप स्थित नागेश्वर मन्दिर परिसरमा शिवर सञ्चालन गरिएको हो ।
शिविरमा पाइल्स, फिस्टुला, कब्जियत, मधुमेह ,थाइराइड, पेसर, युरिक एसिड, ग्यास्टिक, प्रसुति लगायतको जाँच गरिएको डा.ज्योती ठाकुरले बताइन् । उनले बिरामीको उपचारसहित निशुल्क औषधी पनि प्रदान गरेको र कतिपय जटिल समस्या भएकालाई अस्पतालमै उपचार गराउनपर्ने भएको बताइन् । डा.ठाकुरसहित शिविरमा अमीत न्यौपाने, सम्झना मझकोटी, अमृत आचार्य उपचारमा खटिएका थिए ।
नागेश्वर महादेव मन्दिर विकास समिति सचिव एव. स्वास्थ्य शिविर संयोजक शिवराज बरालले धार्मिक गतिविधिबाहेक गाउँठाउँमा अझै पनि स्वास्थ्य उपाचारबारे मानिसहरू सचेत नहुने भएकाले सामाजिक उतरदायित्वअन्तर्गत गाउँमै विशेषज्ञ डाक्टर बोलाएर निशुल्क शिविर सञ्चालन गरेको बताए ।
समितिका अध्यक्ष विष्णुप्रसाद बरालले कुनै औपचारिक कार्यक्रम नगरी नितान्त स्वास्थ्य उपचारलाई मध्यनजर गरी निशुल्क स्वास्थ्य शिविर सञ्चालन गरिएको जानकारी दिए ।
आर्वा मणिदीपमा रहेको महाप्रभुधामसहित नागेश्वर शिव मन्दिरको धार्मिक, ऐतिहासिक र पर्यटकीय महत्वको स्थल भएकाले यसको विकासमा सबै पक्षबीच समन्वय गरी अघि बढ्ने योजना बनाइएको उनले बताए ।
