पोखरा । दियालो आधारभूत विद्यालय, पुतलीबजार १३ स्याङ्जामा बाल दिवसका अवसरमा विद्यार्थीलाई सहयोग प्रदान गरिएको छ । पूर्व विद्यार्थी वीरेन्द्र केसी परिवारले बुबा लोकेश र आमा जमुनाको स्मृतिमा प्रदान गरेको रकमबाट २ विद्यार्थीलाई विद्यालय पोसाकसहित शैक्षिक सामग्री प्रदान गरिएको छ । पुतली बजार १४, सिरिनडाँडा निवासी वीरेन्द्र हाल अस्ट्रेलियामा छन् ।
वीरेन्द्रकी पत्नी प्रमिला, छोरी कुसुम र छोरा प्रशन्नले गरिब तथा जेहेन्दार विद्यार्थीका लागि २० हजार रुपैयाँ उपलब्ध गराएका थिए । उक्त रकमबाट कक्षा ४ मा अध्ययनरत छात्र प्रदीप माझी र कक्षा २ मा अध्ययनरत सुवास नेपालीलाई झोला, जुत्ता, मोजा, स्वेटर, टोपी, कापी, कलम प्रदान गरिएको हो । वीरेन्द्रको परिवारले यसअघि विद्यालयलाई कम्प्युटर, प्रिन्टर उपलब्ध गराएको प्रअ हरिप्रसाद कोइरालाले बताए ।
बाल दिवसकै दिन पुतलीबजार १३ का राजु थापाले विद्यालयमा अध्ययनरत ३८ विद्यार्थीका लागि ट्रयाक सुट उपलब्ध गराएका छन् ।
यसैगरी पुरुषोत्तम कोइरालाले सबै विद्यार्थीलाई पुग्ने गरी टाइ र बेल्ट उपलब्ध गराए ।
विद्यालय र विद्यार्थीलाई सहयोग गर्नेहरुप्रति आभार व्यक्त गर्दै प्रअ कोइरालाले आगामी दिनमा समेत सहयोगले निरन्तरता पाउने अपेक्षा गरे ।
