पोखरा । तिहार अवसरमा अन्नपूर्ण गाउँपालिका–३, मैदानस्थित लक्ष्मी आधारभूत विद्यालयका पूर्व विद्यार्थीबीच पुनर्मिलन हुने भएको छ ।
सो अवसरमा कात्तिक २७ मा वडास्थित आधारभूत विद्यालयस्तरीय नृत्य प्रतियोगिता, २०४९ देखि ०६२ सम्म भर्ना भएका विद्यार्थीबाट पूर्व विद्यार्थी मञ्च गठन गरिने भएको छ ।
साथै विद्यालयका अक्षयकोषदाता, सहयोगी संघसंस्था एवं व्यक्ति, पूर्व शिक्षक, पूर्व सञ्चालक समिति एवं शिक्षक अभिभावक संघका प्रतिनिधिहरुको समेत सहभागिता रहने कार्यक्रम संयोजक शिवकृष्ण पौडेलले बताए । प्रअ टंकप्रसाद भण्डारीले पूर्व विद्यार्थी बीचको एकताले विद्यालयलाई फाइदा पुग्ने विश्वास लिए ।
विद्यालय अध्यक्ष दिलबहादुर केसीले पूर्व विद्यार्थी, अभिभावक, सहयोगी संघसस्था, बुद्धिजीवी लगायत सरोकारवाला सबैलाई विद्यालयमा स्वागत रहेको स्पष्ट पार्दै कार्यक्रम मार्फत विद्यालयप्रतिको माया बढ्ने विश्वास लिए ।
भेलामार्फत विद्यालयको चौतर्फी विकासका सहयोग पुग्ने अपेक्षा गरिएको पहिलो व्याचका विद्यार्थी छविराज पौडेलले बताए । विद्यालय स्थापना २०४९ सालमा भएको हो ।
