जसपा नेपाल त्याग गरेका १८ जनप्रतिनिधिको पद रिक्त, निर्वाचन आयोगद्वारा सूचना प्रकाशित

जनता समाजवादी पार्टी (जसपा) नेपाल त्याग गरेका विभिन्न स्थानीय तहका १८ जना निर्वाचित जनप्रतिनिधिहरूको पद रिक्त भएको छ।

निर्वाचन आयोग, नेपालले राजनीतिक दलसम्बन्धी ऐन, २०७३ को दफा ३२ तथा राजनीतिक दलसम्बन्धी नियमावली, २०७४ को नियम २२ बमोजिम पद रिक्त भएको सूचना सार्वजनिक गरेको हो।

आयोगद्वारा प्रकाशित विवरणअनुसार सिरहाको लहान नगरपालिकाका उपप्रमुख रामचरित्र महतोसहित सिरहा, पर्सा, खोटाङ, भोजपुर, उदयपुर, इलाम र सुनसरी जिल्लाका विभिन्न स्थानीय तहमा निर्वाचित १८ जना जनप्रतिनिधिको पद रिक्त भएको छ।

पद रिक्त हुनेमा उपप्रमुख, गाउँपालिका उपाध्यक्ष, वडा अध्यक्ष, वडा सदस्य, महिला सदस्य, दलित महिला सदस्य तथा जिल्ला समन्वय समितिका प्रमुखसमेत रहेका छन्।

सम्बन्धित दलको केन्द्रीय समितिको निर्णय र आयोगमा प्राप्त जानकारीका आधारमा पद रिक्त भएको सूचना प्रकाशित गरिएको आयोगले जनाएको छ।

Leave a Comment

Your email address will not be published. Required fields are marked *